|
بيري وار ايدي، بيري يوخ ايدي، کئچميش زامانلاردا ايکي اوزاق قوهوم وار ايدي. بونلارين بيري يوخسول ايدي، اؤزو ده مئشهده، بالاجا بير داخمادا اولوردو. او، بيري دؤولتلي ايدي، شهرده، قشنگ، بؤيوک بير ائوده ياشاييردي. بيري وار ايدي، بيري يوخ ايدي، کئچميش زامانلاردا ايکي اوزاق قوهوم وار ايدي. بونلارين بيري يوخسول ايدي، اؤزو ده مئشهده، بالاجا بير داخمادا اولوردو. او، بيري دؤولتلي ايدي، شهرده، قشنگ، بؤيوک بير ائوده ياشاييردي. گونلرين بير گونو يوخسول، مئشه ايله گئديردي، بيردن آغاجين آلتيندا پاريلدايان قيزيل بير للک گؤردو. باشيني قالديريب يوخاري باخدي، گؤردو کي، آغاجدا قويروغو قيزيل بير خوروز اوتوروب. يوخسول قيزيل للگي گؤتوروب بيرباش شهره، دؤولتلي قوهومونون يانينا گتيردي. دؤولتلي قيزيل للهيه باخيب دئدي: – گؤزل شئيدير! آنجاق دگري چوخ آزدير. من سنه بو للک اوچون بيرجه مانات گوموش پول وئره¬رم. يوخسول ايسه عؤمرونده قيزيل گؤرمه¬ميشدي، اونا گؤره ده بيلميردي کي، بو للک خالص قيزيلداندير. او ائله بيليردي کي بو نه ايسه قشنگ پاريلدايان بير شئيدير. اونا گؤره ده او ائله بيلدي کي، اونون قيزيل للگي اوچون گوموش پول ياخشي قيمتدير. يوخسول کيشي او بيري گون يئنه ده مئشهيه گئتدي، همين آغاجين آلتيندان يئنه ده قيزيل للک تاپدي. اونو گؤتوروب دؤولتلينين يانينا آپاردي، يئنه ده عوضينده گوموش پول آلدي. بير نئچه گون دالبادال بو احوالات بئله باش وئردي. بير دفعه ده يوخسول هميشه¬کي کيمي آغاجين آلتينا گلدي، گؤردو کي، قيزيل قويروقلو خوروز برکدن بانلايير: – کيم منيم اوره¬گيمي يئسه، او آدام هر گون باليشينين آلتيندان ايکي قيزيل يومورتا تاپاجاق! کيم منيم اوره¬گيمي يئسه، او هر گون باليشينين آلتيندان ايکي قيزيل يومورتا تاپاجاق! يوخسول بو ايشه لاپ مات قالدي، تئز شهره قاچيب احوالاتي دؤولتلي و آجگؤز قوهومونا دانيشدي. او ايسه جاوابيندا دئدي: – اگر سن او خوروزو منيم اوچون توتا بيلسن سنه اونون اوچون مين گوموش پول وئره¬رم! يوخسول اونونلا بئله شرط کسدي: – سنين پولون منه لازيم دگيل! ياخشيسي بودور کي، منيم ايکي اوغلومو اؤز يانينا آپاريب اونلارا اؤز اوشاقلارين کيمي باخ. من ايسته¬ييرم کي، اونلار عقللي و ساوادلي اولسونلار. دؤولتلي او ساعت سؤز وئردي کي، يوخسولون اوشاقلاريني يانينا آپارار و اونلاري اوخوماغا قويار. بونون عوضينده ده يوخسول کيشي دؤولتلي¬يه سؤز وئردي کي قيزيل قويروقلو خوروزو اونون اوچون توتسون. يوخسول سحر تئزدن مئشهيه، همين آغاجين آلتينا گلدي. قشنگ خوروز دينمهدن يوخاريدان اونا باخيردي. يوخسول نشان آليب اوخلا قيزيل قويروقلو خوروزو ووردو. يوخسول کيشي خوروزو گؤتوروب اوغلانلارينا وئردي، اونلاري شهره، دؤولتلي قوهومونون يانينا گؤندردي. دؤولتلي قيزيل قويروقلو خوروزو گؤروب سئوينجيندن آتيليب-دوشدو. او، اؤزو خوروزون قيزيل للکلريني بير-بير يولدو، سونرا اونو يوخسولون اوغلانلارينا وئردي کي، خوروزو بيشيريب ناهارا اونا وئرسينلر. او، اؤزلوگونده بئله قرارا گلميشدي کي، يوخسولون اوغلانلاريني درسه گؤندرمهيهجک: قوي اونون يانيندا قاليب نؤکرچيليک ائلهسينلر! اوغلانلار مطبخه کئچيب خوروزو بيشيرمگه باشلاديلار. اونلار چاليشيرديلار کي، خؤرک دادلي اولسون، دؤولتلي قوهوملاري راضي قالسين. آنجاق بختلري گتيرمهدي: خوروز بيشيب لاپ حاضر اولانا ياخين، اتين سويو بيردن قازاندا پيققاپيق قاينادي، خوروزون اوره¬گي سيچراييب بيرباش دؤشه¬مهنين اوستونه دوشدو! – واي، بو نه بلادير باشيميزا گلدي! – دئيه بؤيوک قارداش ديللندي. – ايندي گرک خوروزون اوره¬گيني توللاياق. بير باخ ها لاپ چيرکلي دؤشه¬مهنين اوستونه دوشوب. ايندي اونو گؤتوروب آغاميزا وئره بيلمريک... کيچيک قارداش ايسه يالواردي: – خوروزون اوره¬گيني توللاما! من سحردن هئچ بير شئي يئمه¬ميشم. ياخشيسي بودور کي، گل اونو گؤتوروب يوياق، اؤزوموز يئيه¬ک. قارداشلار بئله ده ائلهديلر: خوروزون اوره¬گيني يويوب ايکي يئره بؤلدولر، هره بير پارچاسيني يئدي. سونرا دا بيشميش خوروزو دؤولتلي قوهوملارينين يانينا آپارديلار. دؤولتلي او ساعت باشلادي بوشقابين ايچيني قوردالاماغا کي، خوروزون اوره¬گيني تاپسين. آختاردي، آختاردي، خوروزون هاميسيني يئدي، آنجاق اوره¬گي هئچ يئرده تاپمادي. اوندا دؤولتلي، اوزونو قارداشلارا توتوب سوروشدو: – خوروزون اوره¬گي هاني؟ اونو نئيله¬ميسينيز؟ قارداشلار بو واخت احوالاتي اولدوغو کيمي اونا دانيشديلار. تاماهکار دؤولتلي اونلارين اليندن ائله هيرسلندي کي، آغاجي گؤتوروب اونلارين ايکيسيني ده ائودن قوودو. قارداشلار آغلايا-آغلايا مئشهيه، اؤز يوخسول، بالاجا کومالارينا قاييتديلار. اونلار هئچ باشا دوشه بيلميرديلر کي، بير خوروزون اوره¬گي نه¬دير کي، اونون اوستونده دؤولتلي بو قدر هيرسلنيب اونلاري ائويندن قوودو. گئجه کئچدي، سحر قارداشلار هرهسي اؤز باليشينين آلتيندان بير قيزيل يومورتا تاپدي. اونلار قيزيل يومورتالاري دا گؤتوروب آتالارينين يانينا گئتديلر و باشلارينا گلني اونا دانيشديلار. آتاسي اونلارا دئدي: – منيم او دؤولتلي قوهومومدان اوره¬گيم برک اينجيدي، سيزي ائويندن قوودوغو اوچون من بو پاريلدايان يومورتالاري هر کس اولسا ساتارام، تکجه اونا يوخ. ائله بو واخت ياخينليقدان گزرگي بير تاجر کئچيردي. يوخسول کيشي يومورتالاري گؤتوروب اونون يانينا گئتدي. تاجر دئدي: – آ، بو يومورتالار کي، خالص قيزيلدير! من بو قيزيل يومورتالارا گؤره سنه ياخشي پول وئره¬رم. تاجر بونو دئييب يوخسولون اتگينه او قدر پول تؤکدو کي، او، هئچ عؤمرونده بو قدر پول گؤرمه¬ميشدي. يوخسول کيشي آنجاق ايندي باشا دوشدو کي، دؤولتلي قوهومو اونو هميشه آلداديرميش، – قيزيل للک اوچون اونا گوموش پول وئريردي. “عيبي يوخدور! – دئيه يوخسول اؤز-اؤزونه دوشوندو. – بيزلرده بير مثل وار دئيه¬رلر کي، باشقاسيني آلدادان اؤزو ده آلدانار. ائله بئله ده اولدو. او گوندن بري قارداشلار هر گون اؤز باليشلارينين آلتيندان هرهسي بير دنه قيزيل يومورتا تاپيرديلار. آتاسي بو قيزيل يومورتالاري ياخشي قيمته ساتيردي. اونلار ايندي لاپ ياخشي دولانيرديلار. آنجاق ان باشليجاسي او ايدي کي، قارداشلار اؤز آرزولارينا چاتميشديلار: ايندي اونلارين ايکيسي ده علم اؤيرنيردي و خيلي شئي ده اؤيرنه بيلميشديلر. (آسيا خالقلارينين ناغيل و افسانهلري کيتابيندان)- آراز آذربایجان برچسبها: داستان ترکی
+ نوشته شده در ۱۳۹۲/۰۵/۲۲ساعت 10:20 توسط پیدای پنهان
|
|
درباره وبلاگ  سلام!
امیدوارم از وبلاگم خوشتون بیاد!!!!! The Infinite in Cage
|
